გამარჯობა,
მე ვარ ეკა მირონენკო, სვანეთიდან, კერძოდ მესტიიდან, განათლებით იურისტი გახლავართ და ამჟამად ვმუშაობ იმპორტ-ექსპორტის სფეროში, თაფლი გამაქვს ამერიკის შეერთებულ შტატებში და ვაწარმოებ ხილის უშაქრო ჯემებს. სწორედ ეს უკანასკნელი საქმიანობა გახდა დამაკავშირებელი ჩემსა და ევროკავშირის, შვედეთის და ავსტრიის დაფინანსებით განხორციელებულ პროექტ GRETA - ს შორის, რომელიც დღესდღეობით წარმატებული თანამშრომლობის მაგალითად შეიძლება ჩაითვალოს.
გრეტას შესახებ ადგილობრივი მაცხოვრებლებისგან შევიტყვე, ასევე ინტერნეტითაც გავრცელდა ინფორმაცია და ზოგადად მინდა აღვნიშნო რომ იმდენად კარგი საინფორმაციო კამპანია ჰქონდათ ნაწარმოები, მთელმა მესტიამ იცოდა მის შესახებ. საინტერესო იყო ბიო მიმართულების მხარდაჭერა, რამაც მიბიძგა მეცადა ბედი და ეს ჩემი წამოწყება, სახლის პირობებში უშაქრო ჯემების წარმოება უკვე ნამდვილ სამეწარმეო საქმიანობად მექცია. გამიმართლა და კონკურსში გავიმარჯვე, მივიღე დახმარება და გაჩნდა რეალური შესაძლებლობა საკუთარი ჰობი ნამდვილ ბიზნესად განმევითარებინა. აქვე ვიტყვი რომ მანამდეც დიდი იყო დაინტერესება უშაქრო ჯემების მიმართ, ონლაინ გაყიდვებს ვაწარმოებდი და დიდი მოწონება მქონდა ბაზარზე. თუმცა სახლის პირობებში დიდ რაოდენობას ვერ ვაწარმოებდი, რადგან არ მქონდა შესანახი პირობები, მითუმეტეს იმ შემთხვევაში, როდესაც საქმე უშაქრო პროდუქტის წარმოებას ეხება, შაქარი თავისებური კონსერვანტია და შენახვას ხელს უწყობს. ამიტომ საჭირო იყო სწორი სტერილიზაცია და შესაბამის ტექნიკური ბაზის არსებობა.
დონორების განხორციელებული დახმარების შედეგად მივიღე ჯემების სახარში დანადგარი, სპეციალური სახარში ვაკუუმური ქვაბი, ჩამოსასხმელი დანადგარები, სტერილიზაციის, დასახუფი და ეტიკეტირების აპარატები, მოკლედ სრული ხაზი პროდუქტის გამოსაშვებად. აუცილებელი აღნიშვნის ღირსია პროექტის ფარგლებში ჩატარებული ტრენინგები მარკეტინგის კუთხით, მიღებული ცოდნა დამეხმარა გარკვევაში და სწორი სტრატეგიის დასახვაში. ასევე ბიო სერტიფიცირების მიმართულებით მიღებული ინფორმაცია მინდა ვახსენო, რომლის შედეგადაც უკვე მაქვს გეგმა რა მჭირდება და რა გზით უნდა ვიარო რომ შედეგი მქონდეს.
ამჟამად ვართ საწარმოს აწყობის პროცესში, ფუნდამენტი ჩასხმულია, კომუნიკაციები გაყვანილია და იმედიანად ვარ რომ მალე მივაღწევ სანუკვარ მიზანს და დავიწყებ პროფესიონალურ დონეზე ჯემების ჩამოსხმას. გულწრფელად ვიტყვი რომ ამას ჩემი ძალებით ვერ შევძლებდი და ჩემი იდეის განსახორციელებლად კიდევ ბევრი შრომა დამჭირდებოდა, რომ არა GRETA პროექტი. ეს დამატებითი სტიმულია ასევე რეგიონისთვისაც, რადგან ადგილობრივების დასაქმების შესაძლებლობა შეიქმნება, როგორც უშუალოდ საწარმოში, ასევე თვითონ მოცვის მოკრეფის ნაწილში.
ჩემს მაგალითზე შეიძლება სასარგებლო რჩევის მიცემა სხვა დამწყები მეწარმეებისთვის, რომლებსაც ვეტყოდი რომ არ უსმინონ სხვას და თუ რამის გაკეთება უნდათ ადგნენ და დაიწყონ! და პირველ რიგში თვითონ მეწარმეს უნდა უყვარდეს და მოწონდეს თავისი იდეა, მართლა უნდა უნდოდეს. საგრანტო პროექტს რომ ვწერდი მთელი გულით მინდოდა გავმხდარიყავი პროექტ GRETA-ს მონაწილე, რადგან მართლა მომწონდა ეს უშაქრო ჯემების იდეა, მითუმეტეს მთის კენკროვანი კულტურებისგან, რომლებიც ძალიან ჯანსაღია.
ჩემს გეგმებზეც გეტყვით, დიდი სურვილი მაქვს მდგრადი გავხადო ადგილობრივი წარმოება, შემდეგ უშაქრო ჯემები გავიტანო ექსპორტზე და წარმატებული ქართული ბრენდი შევქმნა. ამ მიზნების მისაღწევად სიამოვნებით ჩავერთვებოდი ახალ საგრანტო პროგრამებში და დაინტერესების შემთხვევაში საკომუნიკაციოდ ხელმისაწვდომი ვარ ტელეფონის: 599423640 და ელ-ფოსტის: client.eff.geo@gmail.com მეშვეობით.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის